Mat 4 | ETR | STEP | Amala hamosebegi, mugabe busaea Yesuea nafade hamomabelela fedogola bimolöïe, Godeïe Gesamia Yesu e sege nafade udia dolö aligisia made ami sigi fedala ifosi.

aMala Bu Eegei 8.3

bSama 91.11-12

cMala Bu Eegei 6.16

dMala Bu Eegei 6.13

fAisaea 9.1-2

Matthew 4

Mugabe busaea Yesuea nafade hamomabelela fedogola bimolöïe misi amo

(Maga 1.12-13, Ulugu 4.1-13)

1 Amala hamosebegi, mugabe busaea Yesuea nafade hamomabelela fedogola bimolöïe, Godeïe Gesamia Yesu e sege nafade udia dolö aligisia made ami sigi fedala ifosi. 2 Amala sigi fedala ifosi nea, Yesu e segeyo nabülasi biyidia, yobage gasigige, molö made naala neamu, sïdëa baagosa nelo. 3 E amala sïdëa baagosa nebegi, nafade hamomalalo mugabe busa amo maalahilä sähalea, Di Godeïe malö nea galëda, igi difolalebe gowelima wahalo hamomalamola säi.

4 Amala säsebegi, Yesuea säla obëgësalea, Ado säla dëdëla negei dibe amea sähalea, Udia dolöea wahalomu nalahiläda namolöi mademelë. Ado sulubadela Godeïe nafiala maasebe amolia namolöila dëdëla negei dialeala säi. ^a

5 Amala säla obëgësebegi, mugabe busaea Yesu sigi, gaamu hïdo elöi Yalusaleme ami awäla, gobela ïlo mosöa ilibiafalï gadogo ifosilahilä, 6 ema sähalea, Di Godeïe malö nea galëda, guilahilä nea hä di dihï nila sadia idogomo. Amoïe ado afädë säla dëdëla negei dibe amea sähalea, Godea ïe selesaia fii amolima dïe säla ïmolömelë. Säla ïaseda, igia dïe emo daualoea, ilia ilile naaboea di gauia adogomolömelëla säla dëdëla negei dialeala säi. ^b

7 Amala säsebegi, Yesuea säla obëgësalea, Ado elö gomalä säla dëdëla negei dibe amea sähalea, Dafidilo Geloi, dïe Gode neebe amo, fedogola bimabiola dëdëla negei dialeala säi. ^c

8 Amala säsebegi, mugabe busaea segebi ilibia edefade neebedaia ami Yesu sigi fedalahilä, sege föi dibe sulubadelaïe gädili elö elöla amoge, ilile nelebo hedabi difolalebe amoge olesa maadei. 9 Olesa maadelahilä sähalea, Dia ne mia emo gumu sasagalahilä, nïe ëi gauia adaseda, nelebo sulubadela beasebe egowelida, digali ïaha maademolömelëla säi.

10 Amala säsebegi, Yesuea säla obëgësalea, Ai. Saidani. Di moholöi mosö. Ado säla negei dibe amea sähalea, Dafidilo Geloi, dïe Gode neebe amo, dia ïe ëi gauia adamalolage, amase, hïlemu hamoi hamomalolage dëdëla negei dialeala säi. ^d

11 Amala säla obëgësebegi, mugabe busaea Yesu dïgïla asi. Asibua, selesaia fii Yesu neebea maala, ilia e ugila negei.

Yesuea Galili ami hamoi mi gäwila hamosa nelo

(Maga 1.14-15, Ulugu 4.14-15)

12 Yone e galabaia mosöa neala säi amo nabalahilä, Yesu e Galili segea obëgëi. 13 Obëgëla awälahilä, e Nasalese gaamu dïgïla, Gabaniama gaamugi namolö asi. Gabaniama gaamuda, oeabo edefade dibe amoïe agesugi Sebulunilele Nafadalilele sege dilo. ^{▼▼4.13 Siiba Isilale sosogo äudä Sebulunile Nafadalileda, Galili oeabo agesugi ami filo. Gaso, Yesu e neebe amo gaalu, sege amoda Galili bolobinisi amogi dilo.} 14 Amo hamoi amoïe Godea ïe bea sälo Aisaeama aligila, bea säla negei amo gausiala digai.

15 Sebuluni segege, Nafadali segege, ëi odoada, idi oeabo edefade dibeamadi ami aulo sege amoge, ödä Yodona agesugi dibe sege amoge, amase, Disiligi Galiligi udia dolö fii odoa yafie maala sefolalebe sege amoge, amolida Sebulunilele Nafadalilele segemu.
16 Segea ami udia dolö gasimi sagaigi nefolalebe amoliada, yo digalo edefademalä melïmelë. Baagoloïe sege augi hawa nefolalebe amolimada yo digala beselegalaimelëla
säla dëdëla negei dialea. ^f

17 Segeyo amo gaalu, Yesuea mi gäwila säla ïahalea, Hebeni Beaha Maadela Sigi Neebe amo ga made dibe amea, dilia asigi besumalola säla ïaha nelo.

Yesuea dolö biyidia seme digiisa nebegi wei

(Maga 1.16-20, Ulugu 5.1-11)

18 Yesu e Galili oeabo edefade dibe amoïe agesudilä awäha nea, ea seme digiilo dolö äudä elowole ëole melï. Elöda Saimono, ïe ëi elöda Fida, amase, ïe edoo Ädulule melï. Eleada ödä edefade amogi seme digiisa nelo. 19 Ele bealahilä, Yesuea elema sähalea, Alia seme nelo amo gadola, udia dolö nimäia na alima neala oleledelä. Ne bëgëla misiëla säi. 20 Amala säsebegi, elea elele selëgë amoli dïgïla, fodolofalï e bëgëla asi. 21 Amila awäha nea, ea edoole edoole elö neebe melï. Elöda Sebediïe malö Yemese, amase, elöda ïe edoo Yone. Elea elele eedobalä ödä du amodaia selëgë hamogisa neebe melï. Bealahilä, Yesuea ele wesebegi, 22 fodolofalï elea ödä duge, eedoge dïgïla, Yesu bëgëla asi.

Yesuea mala säla oleleladigi, oloi wahiladidigisa nelo

(Ulugu 6.17-19)

23 Yesuea Galili sege sulubadelagi nawesa neada, ilile gedolo mosöa säla olelesalea, Beaha Maadela Sigi Neebe amoïe Ado Mala Hedabi säla oleleladigi, udia dolö amoligi olo elö elöla oloi wahiladigi, amase, domalo nalafadela nawei sulubadela wahiladidigisa nelo. 24 Amala hamosa nelo amo, udia dolö Siliamadi nefolalo amoli sulubadelaea nabaha maadei. ^{▼▼4.24 Segeyo Olomoea Yuda beaha nelo amo gaaluda, Galilile Isilalelemadida holöbö bolobinisi edefade ameada, Olomo iliada bolobinisi Siliala sälo.} Nabaha maadelahilä, ilia udia dolö olo elö elöla oloi amolige, së edefade sësa difolalo amolige, amase, mugabe fedai difolalo amolige, amulämei difolalo amolige, fii si sefolalo amolige, sulubadela neala gaula e neebea maasebegi, ea amoli wahisa maadei. 25 Udia dolö yafie Galili amilage, Gaamu Nabülasimadilage, Yalusalemelage, Yudiamadilage, ödä Yodona näiado alömodilage, e bëgëla afiai.